تيم (صحفي سوري يسأل إمرأة سورية لجأت إلى تركيا): 
كسورية مقيمة خارج سوريا، ماذا تعني لكِ المحاكمات الجارية؟ 


صوت المرأة: المحاكمات الي صارت بأوروبا هي خطوة بسيطة لمحاكمة مجرمين حرب ولكن هي المحاكمات أبدا ما بتحصل حقوق السوريين والشعب السوري بالمطلق كلياته

كريستينا: على مدار 10 حلقات مضت، قدمنالكن مدونات صوتية لقصص وتجارب محكية، علسان ضحايا، عائلات، معتقلين ومعتقلات بالافرع الامنية السورية، شهود وشاهدات، مختصات وأخصائيين بالشأن القضائي والحقوقي، واصوات سوريات وسوريين عايشين بتركيا والمانيا وسوريا… 

من خلالهن، قدرنا نِصغي ونضوي على المشهد المتناثر لجهود العدالة والمحاسبة على الجرائم الجسيمة المرتكبة بسوريا، ونفهم جانب من ألغاز التحقيقات، وأسرار المحاكمات القضائية؛ الماضية، الجارية، والقادمة… 

حاولنا نفكّك ونحلل مع بعض، لوين ممكن تاخدنا هي المحاكمات، وشو هو معنى العدالة بظل استمرارية رئاسة النظام السوري المسؤول عن انتزاعها.

واليوم، منكون وصلنا للحلقة 11 والأخيرة من الموسم الأول من مدونتنا الصوتية "قيد المحاكمة: عن متهمي وضحايا الجرائم في سوريا". 

 

كريستينا: قبل ما نبدأ، مهم انّوه انو هالحلقة بتحتوي على اوصاف بتتعلق بجرائم الحرب وجرائم ضد الانسانية. منرجوا انكن تاخدوا الحيطة والحذر، او تتوقفوا عن الاستماع لو احتجتوا.  

كريستينا: بكل حلقاتنا الماضية، كنا نبدأ من القصة، وتاخدنا تفاصيلها على محاكمة او مجموعة محاكمات مرتبطة فيها بشكل من الاشكال، نفهم من خلالها اداة القضاء وكيف بيشتغل وشو هي فُرَصة محاسبة المتهمين او المشتبه فيهن بارتكاب جرائم حرب وجرائم ضد الانسانية بسوريا.

بس بهالحلقة الاخيرة من موسمنا، رح نبدأ بمستجدات عن محاكمات حكينا عنها، لنشوف لوين وصلت، وشو استجد فيها، وبعدين، مننتقل معكن لنصغي لاصوات وآراء سورية، حول سياق العدالة واحتمالات نتائج المحاكمات والعملية القضائية… 

 

بالمستجدات، رح نبدأ من محاكمة الطبيب علاء م. بفرانكفورت/ المانيا، ويلي حكينا عنها بالحلقة التانية من البودكاست، بعنوان الجهاز الطبي وعلاقته بآلة التعذيب في سوريا…

حسب لائحة الاتهامات الموجهة ضدة، يُزعم انه علاء م. شارك بأعمال عنف جنسي وتعذيب وقتل مدنيين سوريين، أثناء عمله كطبيب في المسشفى العسكري رقم 608 بحمص، مستشفى المزة العسكري 601 بدمشق؛ محل ما تم التقاط صور قيصر، وبسجن الفرع 261 للمخابرات العسكرية بحمص.

هالقضية تحديدا، عم بتبيّن انه العنف الممنهج الي بمارسه النظام السوري ضد السكان المدنيين ما بيتم فقط جوّات مرافق الاحتجاز، وانما خارجها كمان، وعن طريق اشخاص وباماكن من المفترض انها تقدم الرعاية الهن، متل الجهاز الطبي والمستشفيات…  

صور قيصر، يلي حكينا عنها بشكل معمق بحلقتنا العاشرة من البودكاست، سبقت هالقضية بشكل ما بِتِبيان هالشي، وقدمت أدلّة لإثبات دور المستشفيات العسكرية بالتعذيب والمشاركة بالقتل… 

غير هيك، هالمحاكمة بدورها رح تساعد بتوضيح دور الجهاز الطبي بتعذيب المعتقلين والمعتقلات والمشاركة بقتلهم، ومن الممكن انها تكون خطوة مهمة لمعالجة قضايا جرائم العنف الجنسي كمان؛ مثلا، النيابة الفيدرالية بتتهم الطبيب علاء م. بإصابة الأعضاء التناسلية لطفل، ولرجل بالغ، بهدف محاولة منعهمن من الإنجاب.

 

من جانب تاني، محاكمة علاء م. مقارنة بمحاكمات انور رسلان واياد الغريب بكوبلز، تعتبر بعيدة عن الصحافة، بالاخص العربية، ما عم يكون في تغطية كثيفة للجلسات، والسبب هو محاولة المحكمة بإبعاد الصحافة والاعلام عن مجريات القضية لتحفظات بتخص مسارها القانوني. 

بس هاد ما بيمنع بعض الصحفيات والصحفيين والمنظمات الحقوقية والانسانية من متابعة القضية وكتابة التقارير عنها.   

أحد هالجهات هي المركز السوري للعدالة والمساءلة. حسب آخر تقرير عن قضية الطبيب علاء م. والمنشور عن جلسة 18 وجلسة 20 تشرين الاول، 2022، المحاكمة ما زالت مستمرة، وجلسات الاستماع للشهود بعدها مكملة، مع حماية كبيرة لامان وخصوصية الشهود من خلال اخفاء اسماء بعضهم؛ الشاهد التالت مثلا معطينه اسم P8. 

خلال جلسة 18 تشرين الاول، استمر القضاة باستجواب الشاهد P8، واستهل رئيس المحكمة الجلسة بسؤاله عن زمان اعتقال الشاهد واطلاق سراحه، وبعدها انتقلوا لعرض مخططات لمجموعة زنازين وغرف وممرات كان رسمها الشاهد P8 خلال استجواب الشرطة الو، وسألوه عن التفاصيل المتعلقة فيها، وطلبوا منه انه يوصفها، ويوصف يلي شافه وعاشه ومرّ فيه جواتها. 

خلال حديثه، وصف الشاهد P8 اللقاء يلي جمعهن هو واخوه، بالمتهم علاء م. بنفس المعتقل، وقال الشاهد انه الطبيب علاء م. عطى اخوه حبة دوا، وانه توفي على إثرها لاحقا. 

استمر القضاة بسؤال الشاهد عن الاحداث يلي صارت بعد وفاة اخوه، واستحضر الشاهد ذكرياته ووصف الاصوات يلي كان يسمعها للمعذبين، بالوقت يلي كان عم يستنى فيه دوره هو، للتعذيب. 

الشاهد كمّل بوصف التحقيق والتعذيبِ الي تعرضله خلاله بطرق مختلفة، منها الصدمات الكهربائية… 


كملت الجلسة بعد يومين مع نفس الشاهد ب 20 تشرين الاول 2022، ويلي تخللها وصف لتفاصيل تانية ما تم التطرق الها سابقا عن مكان الاعتقال، وعن المتهم علاء م. وكل شي صار مع الشاهد لحتى طلع من المعتقل وهرب من الحي يلي كان يسكن فيه بسبب القصف، قبل ما يغادر سوريا كليا بعد كل شي صار، تارك وراه اخوه الي تم قتله، وقدامه محاكمة الطبيب علاء م. يلي رح نعرف مجرياتها اكتر بالايام الجاية…

اذا مهتمين تطلعوا على مجريات المحاكمة ومستجداتها اول باول، مندعوكن لمتابعة المنظمات الحقوقية المهتمة الي تركنالكن روابطها بالوصف المكتوب للحلقة. 

 

مننتقل من محاكمة علاء م. بفرانكفورت، لمحاكمة موفق د. ببرلين، الي يُزعَم انه كان احد اعضاء ميليشيا «فلسطين حرة» التابعة للنظام السوري، ويلي حسب التقارير تسببت بمجازر قتلت مدنيين داخل مخيم اليرموك (الفلسطيني) جنوب العاصمة دمشق. ذكرنا محاكمة موفق د. بالحلقة السابعة من البودكاست، بعنوان الشبّيحة. 


حسب مقال كتبه مراسل المحكمة أولف مورلينج Ulf Morling، ويلي تم نشره ب 28 أكتوبر 2022، بيقول انه موفق د. متهم بسبع جرائم قتل، بالإضافة لتهمة ارتكاب جرائم حرب ضد السكان المدنيين...

اذا نجحت هاي المحاكمة، وتم اثبات الجرائم المتهم موفق د. بارتكابها، فمن المتوقع انها تأدي للحكم عليه بالسجن مدى الحياة… بس كمان، في انتقادات عم تطال هالمحاكمة، ومنذكر منها الانتقاد يلي عم يوجهه الناشط الحقوقي والمحامي باتريك كروكر، يلي هو ايضا محامي احد الضحايا المشاركين بالقضية… 

انتقاد باتريك متحمور حول اتهام موفق د. بجرائم حرب فقط، وهو برأيه، شي غير منصف للضحايا، بحيث لو بتم اتهامه ومحاكمته على جرائم ضد الانسانية، بكون في مجال وقتها انه يتم الترميز لكل تهمه بعينها، ويلي بدورها بتعطي الضحايا حقهم بشكل من الاشكال، وبتساهم بتوثيق شهاداتهم وتربطها بقصصهم. 


بيقول باتريك انه "تم تعريض الناس للتجويع والاغتصاب والتعذيب بشكل ممنهج، وهي أعمال ارتكبتها الميليشيات الي بسيطر عليها الأسد مباشرة". وانواع هالتهم بتوقع تحت خانة الجرائم ضد الإنسانية… 


جلسات محاكمة موفق د. بعدها مكملة ببرلين، وأحدثها كان ب 9 كانون الاول 2022… 
بالجلسة موفق د. ما كان عم يحكي ابدا، وكان تارك محاميه هو الي ياخد هالدور. 

خبرنا المحامي ابراهيم القاسم انه محامي المتهم قال، أنه موفق د. طلع من مخيم اليرموك سنة 2012، وطالب بالاستماع لعدة شهود لإثبات هالشي، واضاف أنه موفق د. "من ذوي السمعة الجيدة."


جلسة الاستماع الجاي رح تكون ب 22 كانون الاول 2022، قبل ما تبدأ عطلة الأعياد… ورح ترجع تكمل بالسنة الجديدة. طبعا، لسا في احتمال انه يتم اضافة تهم الجرائم ضد الانسانية الي عم يطالب باضافتها وكيل جهة الإدعاء بالحق المدني، للائحة التهم الموجهّة ضد موّفق د. والايام الجاي رح تورجينا اذا هالشي رح يصير، ولّا رح تكتفي المحكمة بتهم جرائم الحرب فقط. 

منكفي بالمستجدات، ومننتقل للحديث عن جلسات استماع ما قبل المحاكمة بقضية مجموعة ميليشيا "لواء القدس"، ويلي عم بتم بهولندا، وبلّشت بعد ما تم القبض على واحد من أعضاءها المتهمين.

بدت اول جلسة استماع تمهيدية بأيار 2022، والتانية بآب من نفس السنه، وبعدها كمان جلسة ب 31 تشرين الاول، وفيها تم اتخاذ خطوات تحقيق جديدة، وتم التأكيد على صلاحية اعتقال المتهم بناء عالأدلة المتاحة، ومن المقرر انه جلسة استماع ما قبل المحاكمة الجاي تكون بتاريخ 27 كانون التاني 2023.

هالمحاكمة بتحمل اهمية كبيرة، كونها أول محاكمة جنائية متعلقة بالنظام السوري بتم على ارض هولندا، وعلى عكس ألمانيا، وأقرب على آلية المحاكمات بفرنسا، بهولندا بيتم إعداد المحاكمات مسبقًا على نطاق واسع وشامل قبل ما يتم تقديمهم للمحكمة، وبيتبعو اسلوب إعادة النظر بكل الأدلة، وبيتحققوا منها وبيسمعوا من كافة الشهود المتاحين. وبعد ما تخلص كل هالخطوات، بتبدأ وقتها المحاكمة الفعلية.

خلالها، بيقرأ القضاة الملف وبيتحققوا من صحة الأدلة الواردة فيه. وممكن انهن يسمعوا الشهود كمان مرة، لكن هالشي عادة نادر ما يصير. لأنهن بكونوا سمعوهن بمرحلة ما قبل المحاكمة. 

هالشي بيعني أنه القاضي رح يقرر عالأرجح خلال جلسة 27 كانون التاني إذا كانت القضية رح تُحال للمحاكمة او لأ، وهالقرار والجلسة من المتوقع أنها تُعقد بالنص الأول من سنة 2023. 

 

مننتقل لقضية المتهمين غيابيا: علي مملوك، جميل حسن وعبد السلام محمود، وهيّه قضية ضخمة وعم يتم التحضير الها من سنين طويلة بفرنسا، ومن الممكن انها تكون أول محاكمة ضد مسؤولين رفيعي المستوى بالنظام السوري… بس مع هيك، رح يتم هالشي بدون حضور المتهمين، يعني غيابيًا متل ما قلت، الشي يلي بلش نقاش وتساؤلات عن مدى عدالة هالمحاكمة او حتى معناها وقيمتها الحقيقية، وآثرها الفعلي على المتهمين… 

خبرتنا كليمنس بكتارت (Clémence Bectarte)، أنه المدعية العامة حاليا مشغولة بصياغة لائحة الاتهامات النهائية، وانه بعد ما ترسلها للمحكمة، رح يباشروا القضاة بتحويلها لقضية وعلى هالاساس تبدأ المحاكمة الغيابية للمتهمين التلاتة. الشي يلي على الأرجح حيصير بالنص الاول من سنة 2023… 

 

اخيرا، ورغم انه تقنيا تم إصدار الحكم النهائي بقضية اياد الغريب بسنة 2021، يلي انحكم باربع سنوات وست اشهر، وقضية انور رسلان يلي صدر الحكم فيها سنة 2022 ونحكم عاثرها مؤبد، الا انه تنيناتهن قدموا طعن بالحكم… 

تواصلنا مع المحامي باتريك كروكر يلي كان محامي بعض الشهود بمحكمة كوبلنز بألمانيا، ومنهن رويدة كنعان يلي شاركتنا قصتها بالحلقة التامنة من البودكاست، وخبرنا انه الإستئناف بقضية اياد الغريب نهائي، وتم رفض الطعن، الشي يلي بيعني انه استنزف كافة خيارات الإستئناف، وما ضل عنده غيرهن.

اما انور رسلان، فالإستئناف تبعه لسا معلق، وما منعرف اذا رح يتم قبول الطن او رفضه، وهالشي بيعني انه لسا في احتمال، بناء على نتيجة طلب الإستئناف انه يتم تخفيف سنوات الحبس، او حتى يتم اسقاط الحكم عنه تماما والافراج عنّه، لكن هالشي مو بالضرورة متوقع، ولو صار، رح يكون صدمة كبيرة نظرا لحكم الادانة الأول…

 

فرج بيرقدار:
ما تعنيه العدالة بالنسبة إلي شخصيا ببساطة هو أن أستطيع مسامحة من أساؤوا لي وفي الوقت نفسه محاسبة من أساؤوا للشعوب أو أجرموا بحقهم، محاسبتهم وفق أرقى المعايير والقوانين الي وصلت لها البشرية. لا أطمح بأكثر من ذلك ليس لدي نزوعات حقد ولا نزوعات انتقام ولا نزوعات تشفّي، ولكن أيضا ليس من أجل السوريين فقط من أجل البشرية ككل يعني لازم ما تمر هيك أنظمة وتنجو دائما وإلى الأبد من محاكمات يعني تليق بالمستوى الي وصلت له البشرية…

وفا علي مصطفى:
بعتقد إنه هي المحاكمات هي جزئية صغيرة بس من كل الجزئيات يلي موجودة على مستويات مختلفة ويلي مع بعضها تساهم بخلق سردية مضادة لسردية النظام السوري المدعوم بالبروباجاندا الروسية. وهي السردية كمان يلي للأسف الإعلام العالمي قبلها واستخدمها لمصالح معينة ويلي بتقول إنه ما حدث في سوريا هو حرب أهلية وإنه اليوم سوريا تقود حرب على الإرهاب حرب ضد الإرهاب وهاد طبعا إنكار لحقيقة إنه ما حدث في سوريا هو ثورة سلمية والأشخاص يلي اليوم موجودين في السجون هن مش أسرى حرب هن مش إرهابيين هن معتقلين سياسيين، معتقلين ومغيبين لإنهم تجرؤوا على الوقوف بالشارع والمطالبة بواقع أفضل لأنفسهم ولمجتمعاتهم. طبعا اليوم أكيد في حرب بسوريا هاد لا يمكن إنكاره لكن هي الحرب شنها النظام السوري على المدنيين وهي الحرب اليوم شريكة فيها دول كبيرة روسيا، تركيا، أميركا وتجمعات أخرى مثل حزب الله وإيران وغيرهم الي استخدموا ويلي عم يستخدموا سوريا كساحة لتصفية حساباتهم وصراعاتهم. 

بفهم بالضرورة وجهة نظر الناس يلي بتقول إنه هي المحاكمات لا تفيد وإنه نحن عم نحاكم أشخاص هن يعني رتبهم الأمنية أو يعني مهامهم كانت جدا صغيرة وإنه طبعا أنا بالضرورة مؤمنة بإنه يجب إنه تتم محاسبة جميع مرتكبي الانتهاكات بسوريا من كل الأطراف وعلى رأسهم بشار الأسد بالضرورة. لكن هي بداية، تحفظي على الي صار أو الي عم يصير بهي المحاكمات وإحباطي هو متعلق بإنه ما تم استخدام هي المحاكمات سياسيا يعني لم يتم استخدام النتائج يلي وصلت لها هي المحاكمات سياسيا لتغيير الواقع السياسي في سوريا. لا يكفي ما يحدث داخل قاعات المحاكمة، لا يكفي إنه أنور رسلان كمجرم حوكم في كوبلنز ينحكم لمدة سنوات جيد لكنه لا يكفي يجب استخدام هي المحاكمات سياسيا للتغيير، لإنقاذ الناس يلي بالمعتقلات وأعتقد هاد يلي لليوم محبط. 


حسام القطلبي:
وقت بدنا نحكي عن العدالة الموضوع بيشمل أكثر من مجرد مسألة المحاكمات الجنائية. الموضوع يشمل التعويضات ويشمل مجموعة الإصلاحات ويشمل جبر الضرر وما إلى ذلك للضحايا حتى يكون في إحساس بالعدالة من قبلهن، لكن بالنسبة بموضوعة المحاكمات الجنائية يجب أن تكون المحاكمات الجنائية لكبار المنتهكين لكبار المجرمين حتى يكون في أثر ملموس وواضح لهاد النوع من العدالة وهاد النوع من المحاكمات على النظام. وهاد شيء لا تستطيع محاكم محلية، لا يستطيع قاضي محلي بقرية صغيرة بألمانيا أو بفرنسا الوصول لمحاكمة من هاد النوع هاد الشي بحاجة لمحكمة جنائية مثل الي انشأت من أجل رواندا، من أجل يوغوسلافيا نحن عم نحكي عن محاكم بميزانيات تفوق 300 مليون، الموظفين يفوقون ألف موظف مختلف الخبرات والاختصاصات يعني بالتأكيد هذا مانو متوفر هلأ وعدم توفره ما ببرر تقديم هذا النوع من المحاكمات المحلية على أساس إنه هو العدالة وهو أو هو حتى خطوة باتجاه العدالة. أنا حتى ماني مقتنع إنه هو حتى هو خطوة باتجاه هي العدالة. شايف إنه هو ربما يكون خطوة بالاتجاه المضلل أو ربما يكون خطوة باتجاه الفرعي للعدالة مهرب، خروج للدول ويعني الهيئات الدولية المعنية بمسائل العدالة لغسيل ماء الوجه ليعني مداراة الحرج حول يعني هي الفضيحة الدولية إنه لحد الآن ما في أي تحرك جدي باتجاه محكمة دولية خاصة بجرائم الحرب بسوريا. 


بيان ريحان:
بسبب الظروف الي مريت فيها كنت خسرانة يعني أنا كنت مفكرة طلعت بصحتي الكل بما إنه متل ما بنقول نحن إنه ما في إصابة ما خسرت إيد ولا رجل ولا عين يعني بس لما وصلت على ألمانيا بلشت رحلة العلاج اكتشفت إنه أنا صاير معي بلاوي كثيرة ومالي عرفانة يعني. 

خيليني قول إنه يمكن هاد الشيء هو جزء بسيط من العدالة يمكن إنه تحقق لإلنا بمحاكمات ميدانية يعني لمجرمين حرب. نحن بنشهد إنه كيف هن عملوا فينا وساووا وأنا خاصة بما يتعلق بخلينا نقول من رأس النظام السوري ورأس النظام الإيراني والروسي أيضا. يعني مثلا مجزرة العنقودي مستحيل أنساها يعني هي كانت بقصف روسي علينا إضافة لمثلا موضوع إنه الإيرانيين الذبح الطائفي كان عم يقوموه فينا هاد كمان ما يعني مستحيل ننساه أو حتى المعاملة الي كانت يعني مثلا داخل المعتقل المعاملة كونه أنا من منطقة معينة ولا مثلا لابسة حجاب ولا كذا إنه هي المعاملة طريقة التعذيب تبعهن هي مستحيل أنا يعني بالنهاية نحن يعني المحاكمة هي جزء بسيط من مسار العدالة الي نحن عم نسعى له… 


ابراهيم القاسم:
القضاء الدولي سواء المحاكم الجنائية الدولية المشكلة سابقا بحالات مثل يوغسلافيا السابقة أو المحكمة الجنائية الدولية أو المحاكم الأوروبية الوطنية يلي بتعتمد للولاية القضائية العالمية الشاملة هو قضاء استثنائي وتكميلي للقضاء الوطني بأي دولة ثانية. 
الأساس بالمحاكمات بهاد النوع من الجرائم هو إنه يتم اللجوء إلى القضاء الوطني لملاحقة مرتكبي مثل هذه الجرائم. لا يمكن تصور أن يقوم القضاء في دول مثل ألمانيا أو دول أوروبية بالنظر بجميع الانتهاكات الجسيمة لحقوق الإنسان في سوريا يلي هي مستمرة على مدار الساعة من بداية ال 2011 وهون بكون بعدة عوامل أو بسبب عدة عوامل أهمها الحجم الكبير لهي الانتهاكات و جسامتها والتكلفة العالية لمثل هيه الإجراءات القضائية وبالمحصلة كمان عدم القدرة على الوصول لمسرح الجريمة داخل سوريا وجمع الأدلة بشكل مباشر.

برأيي إنه سوريا بتحتاج لسلام بترافق مع تحقيق العدالة لكل السوريين وهذا السلام ما بتحقق أبدا بدون ضمان ودعم وتسهيل وصول الجميع إلى العدالة يلي هن عم ينشدوها أو برغبوا فيها. وما بتحقق بدون وجود رغبة دولية حقيقية بوضع حد لهذه الانتهاكات وتحقيق السلام بسوريا. 


مريم حلّاق:
ما فيني قول غير إنه هي المحاسبة يعني هي طريقنا لتحقيق نوع من العدالة. يعني ما في أي عدالة ممكن ترجع لي ابني أو ترجع أبو فلان أو أخ فلان… كتير صعب إنه يتخيل الواحد إنه حدا ممكن يوصل التعذيب فيه لوحشية البشر إنها توصل إنك تتخيل إنه بعذبوا ناس لهالدرجة. فالمهم إنه هاد أنا الي بقولوا، أنا كأم لشهيد أطالب طبعا بمحاسبة بشار الأسد. أنا هلأ عم طالب بمحاسبة الرأس أولا وبعدين البقية أكيد الي احنا بسوريا ما حنقدر لإنه المنتهكين أو المرتكبي الجرائم بحق الشعب السوري كتار… 

بس المجتمع الدولي لسى ما أخد قرار إنه يكون معنا وهاد الي هلأ موقفنا يعني. وإلا بس ياخدوا القرار إنه خلص وخلص دوره لبشار الأسد بصير أكيد بصير في اتفاقيات وبصير في يعني إن شاء الله يكون سلام. بس الي جاي أصعب لسى من الي رايح وسنوات طويلة بدها لنزع السلاح من أيدي الجميع. كتير شيء صعب الي بده يعني الي صار والي بده يصير لسى بس أكيد يوما ما ستنتهي متل تجارب العالم كلها. بتنتهي بس على حساب الناس العاديين الي متل ما بقولوا ما هن كسبانين شي لا ناقة لهم ولا جمل في الموضوع بس حكوا بس علو صوتهن شوي… 


صوت سوري من سوريا:
بالنسبة للشعب السوري ما عاد يؤمن بالعدالة يعني طول هالأعوام صار لهن 11 أو 12 سنة ما شافوا أي ذرة عدالة مثلا مثل اخر شي طلعت مجزرة التضامن انتشر خبرها مثل الهشيم يعني ضجت الدنيا فيها بعدين أخمدت ما عاد إلها أثر ولا حدا يسأل عنها. بآخر فترة شفنا إنه فرنسا تقوم بالإجراءات للمحاسبة وما ندري ايش آخرتها يعني بجوز تنطفي مثل هي كمان وبجوز توصل تقدر للفاعل إذا الفاعل بقطر يعني الأمور سليمة أما برأيي مثل ما قال أوتو فون بسمارك المستشار الألماني قضايا هالعصر ما بتنحل إلا بالحديد والنار، يعني لا بعدالة ولا بالسياسة قضيتنا ما بتنحل إلا بالحديد والنار 
أما بخصوص إنه هل المحاكمات بتخدمني أو بتفيدني؟؟ هالمحاكمات هي بتخدم كل مين يحاول يوصل مجرمي نظام الأسد للعدالة وبتفيد الشعب شوي إنه فيها بصيص ولو قليل جدا من العدالة أكيد إلها أثر في السياق السوري هالمحاكم يعني المحاكم فيها تستخدم المجرمين هدول كشهود على الأسد وآل الأسد ونظامه الفاسد… 


صوت سورية من ألمانيا:
محزن هو إنه أنت تعملي جرم بمكان وتستني العدالة من مكان تاني كثير محزن محزنة الفكرة. المفروض إنه من مكان ما صار الجرم هاد تتم هنيك المحاكمة فأنا ما عم حبها هي الفكرة كمان إنه اوك بس هي سوريا صايرة متل الثقب الأسود أصلا بتحسي إنه غابة ما عاد فيني سميها غابة ثقب أسود فعليا يعني…. يعني أقل شي كناس عايشين بأوروبا ما بدنا مجرمين يجو لهون ويفكروا إنه الأمور سايبة ويزيدوا يعني يمشوا بيناتنا وأنت تحسي قاتلك ماشي قدامك وأنت يعني ما صار له شي يعني أقل شي العالم تختشي على دمها بهالمعنى يعني إنه يعرف حاله إنه اوك بجوز أنا بكرا ولادي أنا يصير علينا ضرر إذا هلأ قاعدين عم نقتل والأمور يعني متل بالغابة متل بسوريا مثلا. يعني إذا نفذ بسوريا ما رح تنفذ بمكان ثاني. 
صوت سوري من المانيا: [00:04:14]
ما بتوقع إنه المحاكمات حيكون إلها تأثير على السياق على مجريات الأمور يعني حاليا نحن already صرنا يعني بعد الثورة بحوالي 11 سنة فما بتوقع إنه لسى في مجريات أحداث مهمة رح تصير أو عم تصير وتأثر عليها المحاكمات بس أكيد يعني هاد الشي ما بقلل من قيمة هي المحاكمات إنه تصير… 


صوت سوري من تركيا:
بالنسبة للمحاكمات الي عم بتصير بأوروبا أنا بشكل شخصي ما بتفائل فيها أبدا ولا بحسها إنه هي بصراحة تفي بالغرض أو حتحقق شي من العدالة أبدا. أنا كسوري ما بشوفها حتحقق لي شي من العدالة، ليش؟ يعني أنا مع إنه يتحاكموا هدول الشبيحة كلهن الي انحكموا لكن هاد الخطوات الي عم يشتغلوا فيها هيدي المحاكم كتير بطيئة يعني اليوم نحن في مليون سوري قتلهن بشار الأسد وجماعته وغيره بالطيران والبراميل وبالكيماوي في لحد اللحظة هي وأنا عم سجل، ناس عم يموتوا سوريين شباب وفي أطفال وفي ناس عم يطلعوا تهريب على من تركيا ومن غيرها من الدول اللي وضع الاجئين فيها سيء عم يطلعوا وعم يموتوا على طريق بلغاريا… كنت عم شوف بالفيسبوك بأحد المجموعات أم عم تسأل على ولادها 2 شباب عم إنه مشان الله حدا شوفلي صورهن هدول الشباب طلعوا على طالعين تهريب من تركيا على أوروبا اي فواحد معلق لها بصورة لاثنين ميتين عم يقول لها ممكن يكونوا هدول. طب هاد الموت الي نحن عم نعيشه اليوم كسوريين 13 مليون سوري تقريبا مهجرين بكل الدنيا نازحين، مليون سوري مات والبلد تكسرت، المجرم باين مين هو يعني اليوم ما في لما بيتواصلوا تبعوت المحاكم لما كنت قبل فترة يعني صار كذا حدا تواصل معي ومع كتير شباب كانوا بسوريا وبالحصار وهيك بسألوا تفاصيل وكأنه هي جريمة غامضة ومش باين لها راسها من رجليها وهن عم يحاولوا يحققوا إنه الصاروخ وين نزل؟ الحواجز كانوا يضربوا الناس متلا؟ حدا صار قدامك مثلا موقف؟ طب صار يعني اليوم في فيديوهات ما في داعي تسألوا حدا المجرم باين مين هو… يعني ما بعتقد بدها القصة كل هالتفاصيل هي والمصاري والمحاكم والروحة والجية طيب المجرم موجود يلي هو بشار الأسد.


ثائر حجازي: 

I think that our chances for rendering justice are very scarce. Some lawsuits have been brought against the regime at the Universal Jurisdiction in addition to some complaints and cases filed here in Europe, but we don’t have a criminal court for Syria and the file wasn’t referred to the International Criminal Court as a result of the Russian intervention, and there’s no Syrian court and I don’t know what might happen in case of establishing a transitional justice and holding the perpetrators accountable for their actions. 

Thus, I’m not very optimistic, but at the same time, we can’t stay still and wait for a political change because we can be active in some domains, and that might help us in advocating for our cause and putting pressure on countries and their policies in the future. We hope that our case gets referred to the International Court, maybe in case the Russian role within the security council changes. So, like all Syrians, that's what we aspire for, but am I optimistic or happy? Or do I feel that the children, women and elders who were victims of the regime will be compensated? And will the perpetrator receive a penalty? Honestly, I’m not very optimistic regarding those issues.

 

رويدة كنعان:
لما رحت على المحكمة وشفت حجم الإعلام الموجود؛ هلأ بمحل أنا كنت مبسوطة لإنه كثير منيح يتضوى على خلينا نقول القضية السورية بشكل عام مش بس كوبلنز يعني هي كوبلنز بوقتها هي أعادت القضية السورية للواجهة إعلاميا بس بنفس الوقت خفت إنه يعني عندي إحساس إنه مو محرزة يعني إنه كثير منيح إنه يتحاكم هاد الشخص وكثير منيح إنه تصير هي المحكمة بس خفت بإنه يصير تصور للعالم إنه هي حققنا لكم العدالة شو بدكن أكثر من هيك. بس أنا ما بدي يعني أنا بدي العدالة من هاد البني ادم بس في لسى أشخاص أكبر منه بكثير


جمانه سيف:
أهمية هي المحاكمات وهي التحقيقات الي عم بتصير إنه بهاد الوقت بالذات وإنه ما زالت الجرائم مستمرة… أول شي إنه هي عم تحفظ هي الأدلة، عم تحفظ هي الشهادات إنه أنت بتعرف مع الوقت مع الزمن إنه حتى الذاكرة بتتشوش، إحساس الظلم كمان بضل عميق وبتم عم بيتفاعل وتبعات هي الجرائم بتم يعني إلها آثارها السلبية وتبعاتها. أنا برأيي هاد المسار وهي المحاكمات يلي عم بتصير رغم إنه بالنسبة لحجم الجرائم الي صارت اللي ارتكبت والي ما زالت ترتكب إنه أكيد إنه ما بتتناسب أبدا ولكن برمزيتها، بما كشفت عنه من حقائق على هي مثل بما فحصته من أدلة وإثباتات وتوثيق كل ما جرى… كل هي الجرائم ارتكاباتها، الطريقة الي ارتكبت فيها، الأوامر يلي أعطيت كل هاد أنا برأيي كثير مهم كخطوة أساسية يعني على طريق العدالة حتى للمضي قدما. نحن الي دائما عم بنطالب فيها إنه إلى الان يلي مع النقطة يلي وصلنا منه أو ما حققناه من يعني إلى الان هو كثير مهم بس لا مهم إلنا إنه حتى كأساس لنبني عليه لاحقا. 

 

كريستينا: حلقات هالموسم من كتابة واعداد وإنتاج سليم سلامه، تحرير وتحقق من المعلومات ميس قات، تقديم ومشاركة بالتحرير كريستينا كغدو، مشاركة بالتحرير فريتز سترايف، وباقي فريق العمل يلي بتلاقوا بعض اساميهم بالوصف المكتوب.

أُنتج هالموسم بدعم من وزارة الخارجية الألمانية عبر معهد العلاقات الخارجية وبرنامج تمويل ZIVIK.