تحكي لنا بيان، المسعفة المتطوعة التي عاشت تحت القصف أثناء عملها في المشافي الميدانية بمدينة دوما، عن المجازر التي شهدتها أثناء استهداف النظام السوري للجهاز الطبي بكافة أشكاله وتخصصاته، ويكشف لنا ثائر حجازي، نائب رئيس رابطة ضحايا الأسلحة الكيمائية، تفاصيل صادمة عن يوم مجزرة الكيماوي في دوما عام ٢٠١٣، وما واجهه أثناء توثيقه للمجزرة.
سنتعرف سوياً على مفهوم "العمليات العدائية الكبرى" وآليات جلبها إلى طاولة القضاء
تنويه: تحتوي الحلقة على اوصاف مؤلمة تتعلق بالمجازر، القتل على نطاق واسع وممنهج، والاستهداف المباشر للمستشفيات واماكن التجمعات الميدانية في سوريا. يرجى اخذ الحيطة او التوقف عن الاستماع إذا لزم الأمر
نأخذكم في هذا البودكسات عبر رحلة وتجربة صوتية متكاملة، نستمع من خلالها إلى قصص وتجارب حول المشهد المتناثر لجهود العدالة والمحاسبة على الجرائم الجسيمة المرتكبة في سوريا من قبل النظام، في محاولة لفهم ألغاز التحقيقات، وأسرار المحاكمات القضائية
هذه الحلقة من كتابة وإعداد وإنتاج سليم سلامه، تحرير وتحقق من المعلومات ميس قات، تقديم ومشاركة بالتحرير كريستينا كغدو، مشاركة في التحرير فريتز سترايف
فريق البحث والتوثيق الميداني: عزّام مصطفى وشام العلي
مكساج وماسترنغ: عبد الرزاق الصطوف
أُنتجت هذه الحلقة بدعم من وزارة الخارجية الألمانية عبر معهد العلاقات الخارجية وبرنامج تمويل
ZIVIK
مصادر ومراجع
قبل ما نبدأ، مهم انّوه انو هالحلقة بتحتوي على وصف دقيق لممارسات عنيفة ودموية. منرجوا انكن تاخدوا الحيطة والحذر، او تتوقفوا عن الاستماع لو احتجتوا.
بيان: طبعا أنا ما عندي أي خبرة طبية غير الي تعلمته خلال أول سنة بالثورة من دورات إسعافية وكذا هو إسعاف أولي مانو إسعاف تخصصي رحنا على المشفى الميداني أول يوم فبلشنا إنه نساعد كان في بس بعض الممرضين الموجودين وكان في طبيب واحد معنا هو طالب طب وليس يعني طبيب متخرج. فبلشنا نشتغل…
كريستينا: بشهر تمّوز سنة 2012، ولمّا كانت الثورة باشدّ ايامها، ازدادت شدة الخطورة على حياة الناس بشكل عام، والجهاز الطبي بمختلف اشكاله وتخصصاته، بشكل خاص؛ تحديدا بعد ما تبنّى بشار الأسد القانون رقم 19 الخاص بمكافحة الارهاب.
لمّا بلّش يتطبّق هالقانون، الخطر على الافرقة الطبيّة بمختلف تخصصاتها وأشكالها ويللي كانوا بيرغبوا بالاستمرار بمعالجة المتظاهرين صار حقيقي ومدعوم، بالاخص بمناطق المعارضة. |
اهلا فيكن بالحلقة الثالثة من "قيد المحاكمة: عن متهمي وضحايا الجرائم في سوريا". مدونة صوتية باللغة العربية منِصغي فيها لقصص وتجارب حول المشهد المتناثر لجهود العدالة والمحاسبة على الجرائم الجسيمة المرتكبة في سوريا، في محاولة لفهم ألغاز التحقيقات، وأسرار المحاكمات القضائية؛ الماضية، الجارية، والقادمة.
|
رح نصغي ونتعرف سوا مع ضيفتنا المُسعفة المتطوعة بيان ريحان، على آلية استهداف النظام للجهاز الطبي بكافة اشكالة وتخصصاته. ونّناقش مع ضيفنا الناشط ونائب رئيس رابطة ضحايا الأسلحة الكيميائية في سوريا، ثائر حجازي، الجرائم واسعة النطاق ومجازر الكيماوي وغيرها من العمليات العدائية الكُبرى والممنهجة الي شهد عليها بمنطقة الغوطة خلال فترة وجوده فيها. |
كنت مدرسة وبلشت أبني اسمي بوقت مبكر، عندي شعبية كتير كبيرة بين طلابي على مستوى المدينة. كنت سنة رابعة ما كنت لسى متخرجة لما بلشت الثورة السورية لكن بالرغم من كل الأبواب المفتوحة خليني قول كان الضغط الهائل الي عايشينه على الصعيد الاجتماعي
عشنا مع بنات ضباط خليني قول الي كانوا هن زميلات لإنا بالمدرسة وشفنا الفساد كيف كان يعني. فهي الأمور كلياتها بتخلي عندك أنت جاهز للثورة لكن أنت تنتظر إنه في مقولة إنه مين حيبلش لأكون أنا الثاني لما بلشت الثورة السورية من أول يوم بأول مظاهرة نزلوها |
خلال هالفترة، كانت بيان منقطعة تماما عن العالم الخارجي، وما عندها اي وسيلة اتصال او معرفة ب شو عم يصير برات الحبس. |
ما طلعت بشكل عادي، لا طلعت بصفقة تفاوض، بأول صفقة تفاوض صارت بين الجيش الحر والنظام السوري بالأسرى ب48 كانوا الإيران بالغوطة الشرقية تم التفاوض على أسمائنا… فسبحان الله بصفقة التفاوض الي صارت يعني خلال شهر كنت طالعة لإنه صار في ضغط كثير كبير من أهالي المدينة على الجيش الحر وقتها حتى تم التفاوض على اسمي وتم إطلاق سراحي بعد كشرط أول بالصفقة. طلعت عن طريق منظمة الوسيط الي كان ما بين النظام والجيش الحر كان دولة قطر وكانت (IHH) منظمة التركية فلما تم إطلاق سراحي وأخذنا بالسيارة كان هو بولنت ومساعده عزت شاهين هو مديرة منظمة (IHH) ومساعده. فلم طلعنا فقال لي إنه انت محكوم عليكي شبه بالإعدام يعني عند النظام السوري وما لازم تضلي بسوريا ولا لحظة وأساسا من أحد شروط التفاوض كان إنه أنا اجمع أوراقي الرسمية وكذا وأطلع معهم مع الأتراك أطلع من سوريا يعني… فقال لي عزت شاهين لهلأ بذكر هي اللحظة
|
كريستينا: بنفس هاليوم والتاريخ، ومع وصولها برفقة سيارة هيئة الإغاثة الإنسانية وحقوق الإنسان والحريات "IHH" التركية، بدت آثار القصف الي كانت مبلشة من الصبح بكير على مدينة دوما، تظهر بوضوح لبيان… بوقتها، اعلنت الهيئة العامة عن تعرض دوما لقصف عنيف بالأسلحة التقيلة من جهة شارع حلب وسط تحليق كثيف للطيران. بيان متل ما ذكرت بحديثها، رفضت انها تغادر مدينتها بوقتها، وبعد ما خبرت عزت شاهين بقرارها، وصلتها سيارة المنظمة لاحد نقاط الجيش الحر… |
كان أهلي نازحين كمان لإنه أساسا المدينة كانت عم تتعرض لقصف كثير شديد يعني ما في حدا والمجازر عم تمشي يعني النظام ارتكب أول مجرزة بمكان كثير قريب على بيتي يعني جدا قريب على بيتي والمجزرة الثانية بالقسم الثاني من المدينة، فالوضع كان كثير مدينة أشباح يعني. فما في حدا… فالوضع كان كثير سيء أساسا يعني الزنزانة الي كنت محبوسة فيها المنفردة كنت أنا ورفيقتي كانت هي عبارة عن متر ونص ب50 سم لالنا احنا التنتين، والفتحة بس هي 15 سم فتحة التهوية يعني فالوضع كان جدا سيء. فالكرة إنه لما طلعت من الاعتقال وكذا فكان بس في مجموعة شباب من الجيش الحر هن موجودين قريب منا بحيث إنه النظام إذا اقتحم المدينة إنه ننزل وهن بياخدونا يطالعونا من المكان الي احنا حطونا فيه يعني المؤقت. لإنه إذا لقطني النظام ثاني مرة ما في طلعة يعني فهيك الي صار… فأنا قلت لهن إنه طب أنا مو معقول ضلني قاعدة هون بالبيت شو ممكن نساوي؟؟ |
كريستينا: استمر القصف على دوما، وزادت المجازر وأعداد القتلى، وبيان كانت عم تشوف وتعيش كل هالظروف وبتدور على شي ممكن تعمله حتى تساعد وتدعم مدينتها والناس الي ضلّوا، رغم تغّيب اهلها عنها يلي اضطروا ينزحوا من دوما قبل ما تطلع هي من الحبس… بهديك الفترة، كان في مستشفى ميداني عم يسعف ويقدم مساعدات و اسعافات أولية للمصابين والمصابات، وبسبب النقص الحاد بالكادر الطبي، قررت بيان انها تنضم للمستشفى كمتطوعة رغم شبه انعدام خبرتها بالموضوع. وقتها، اتطوّعت معها كمان زميلتها نور، وبفضل دورات الاسعافات الاولية الي اخدوها ببداية الثورة، قدروا انهم يبلشوا يساعدوا المرضى والمتأذيين من المجازر الي كانت مستمرة بالمدينة… |
فأنا كمدرسة بتشتغل إنه هدول طلابك، إنه حتى احنا لما بلشنا بالثورة إنه كان بدنا نلاقيلنا مستقبل أفضل من المستقبل الي احنا كان عم يستنانا. فتتفاجأ إنه تلاقيهن مصابين وجرحى وشهداء قدامك يعني فكان الموضوع كثير يعني ما بقدر أتجاوزه لحد الان يعني. وهي فيما بعد هي الطالبة استشهدت يعني. |
تم ايضا خطف واحتجاز عاملين وعاملات في المجال الطبي، الشي الي كان بيأدي غالبا للموت خلال او بسبب التعذيب، أو عن طريق الإعدام. التقارير افادت انه بسنة 2015، بحلب، هَرَب، او اُحتِجز، او قُتل اكتر من 95 % من أطباء وطبيبات المدينة، والانخفاض بعدد الوفيات بالتخصصات الطبية ما بشير بالضرورة لانخفاض شدّة النزاع، وانما السبب عالأرجح هو تراجع عدد المهنيين الطبيين الي ضلّو بالبلاد. |
حتى نستمر بحديثنا، مهم نتطرق لتوضيح معنى ومفهوم الأعمال العدائية الكبرى و الجرائم الممنهجة… العمليات العدائية الكُبرى او الواسعة النطاق، هي الجرائم الي بتستهدف اعداد كبيرة من المدنيين والمدنيات دفعة وحده، وعلى سبيل المثال، بتم تنفيذها من خلال الهجمات بالأسلحة الكيماوية، او عن طريق اطلاق النار او الاعتداء، او القصف باستخدام الأسلحة الممنوعة متل القنابل العنقودية او البراميل المتفجرة على المستشفيات، المدارس، أماكن تجمع المواطنين والمواطنات، متل الاسواق او الشوارع الرئيسية المزدحمة… هالاعمال العدائية الكبرى تعتبر جرائم حرب مشينة، خصوصا اذا تم تنفيذها بشكل ممنهج او متكرر، وبالتالي بتم اعتبارها جرائم ضد الإنسانية؛ هالانواع من الإعتداءات عشوائية، بمعنى انها ما بتهتم بمين هن ضحاياها، سواء كانوا مدنيين، اطفال، محاربين، مرضى، الخ… الهدف من هالعشوائية هي اثارة الرعب والخوف بقلوب السكان، المدنيين والمدنيات، تخويفهن، وكسر ارداتهن بانهن يقاوموا، وبالسياق السوري، تهجيرهن قسرًا لإعادة تنظيم خريطة سكانية حسب خطط سياسية أو طائفية معينة. ضيف حلقتنا، ثائر حجازي، الشاهد والمُوَثِّق لعمليات عدائية كُبرى ومجازر الكيماوي وغيرها بالغوطة، شاركنا تجربته الشخصية والاحداث الي شهد عليها، والمظاهرات الي شارك فيها من اول ايام الثورة عام 2011… |
ثائر: أنا اسمي ثائر حجازي من مدينة دوما بالغوطة الشرقية مواليد ال86، دراستي حقوق كنت أكيد عم بدرس بقبل الثورة شكلنا شي اسمه تنسيقية مدينة دوما هي التنسيقية هي مثل ما بنعرف مثل أي تنسيقية بكل سوريا شباب تكونوا بين بعضهن لينقلوا الصورة اللي عم بتصير بمدينتهن أو بمنطقتهن للإعلام الخارجي ولوسائل الإعلام كنت مثلا ماسك كذا مجموعة وأنا تحت مني مثل ناشطين يعني شباب صغيرة إنه عشرينات وتسعطشات وهدول يلي عندهن بحبوا إنه هاد إنهن يطلعوا يتظاهروا يرفعوا أعلام ولافتات وينظموا ويشتغلوا فنحن أنا كنت يعني عندي هي المجموعة وأنا قودهن مثلا وأنا عندي ارتباط مع مجموعات ثانية مثلا بالمكان الفلاني بالساعة الفلانية حنطلع مظاهرة. |
كريستينا: بهديك المرحلة، تم إنشاء مكتب المراقبة والتوثيق التابع للجنة تنسيق الثورة السورية في مدينة دوما، وثائر كنت احد اعضاء هالمكتب الي تألف بوقتها من 6 ل 7 أشخاص. بفضل دراسته للقانون، وبالتعاون مع باقي الأعضاء وبمساعدة محامين ومحاميات، قدر ثائر انه يشكّل استبيان قانوني بيسألوا من خلاله الناس المشاركين والمشاركات في المظاهرات عن الموقوف ين من عائلاتهن أو أصدقائهن، لتوثيق هالحالات وارشفتها… |
ثائر: مرت 2011 و2012 بنفس السيستم، بنفس العمل تبعي أنا الحقوقي. طبعا إضافة لنشر الأخبار إضافة لشوية مداخلات كانت على القنوات لحد 2013 |
كريستينا: بشهر آذار، سنة 2013، وقبل اشهر من اختطافها، دخلت الناشطة ومحامية حقوق الانسان السورية رزان زيتونة على الغوطة، وتوجهت لمدينة دوما تحديدا، وهنيك، التقت بمجموعة من النشطاء، وخلال الإجت ماعات الأولى، التقى فيها ثائر… |
ثائر: عرفتها عن حالي، وقت ورجيتها الاستمارة فهي كثير انبسطت يعني أنتوا حاسنين تعملوا هاد التنظيم عندكم وهاد كثير ممتاز وهي ألا مدافعة عن حقوق الإنسان فيعني كان بدها تعمل يعني نواة لمكتب ويلي هو مكتب تابع لل VDC لمركز توثيق الانتهاكات ففعلا سألت عني وتواصلت معي إنه تعال أنا لازم تكون معنا أنت ضمن الفريق. وفعلا أنا صرت عضو بال VDC بهي الفترة تقريبا كنت بالشهر الخامس، السادس تقريبا 2013 طبعا خضعت لتدريبات على إيد رزان وتدريبات القوانين الدولية وكذا وكيف التوثيق وكنت أطلع معها جولات يعني كل جولاتها أنا كنت معها الغوطة كان دوري هو توثيق الانتهاكات بالدرجة الأولى الشغلات الي كنا نوثقها هي الخسائر يعني بمعنى الضحايا يلي سقطوا بالقصف وغيره والاعتقالات حالات الاعتقالات يلي تصير من كل الأطراف حتى بما فيهن المعارضة. إضافة لتوثيق المجازر يلي كانت تصير يعني نحن ما كان يمرق أسبوع إلا ليصير في حدث بمنطقة معينة، اقتحام لمنطقة معينة من قبل الأمن، كان في مجازر تصير بالغوطة ب2012 بالتحديد صار في إعدامات ميدانية بدوما خلينا نقول بالضبط وفي مناطق ثانية أكيد بالمليحة وبزبدين وبكذا منطقة وحتى بحرستا لكن بدوما الي صار الأمن قتل بشهر 6 قتل عوائل كاملة بأثناء اقتحامه لمدينة دوما ووصل الرقم لأكثر من 80 شخص إعدام ميداني يعني يفوت على البناء يكون في عائلات لسى ما نزحت أو ما حسنت تطلع فالنظام لما اقتحم هاد الحي فعمل مجازر هي المجازر أنا شهدت عليها أو مثل ما بقولوا وثقناها. في كمان المجزرة يلي صارت بشهر 10-2012 يلي صارت كمان بمدينة دوما أحد الحواجز بوسط مدينة دوما دخل بالليل تسلل لأحد الأبنية وقتل كل القاتنين بالبناء من آل العابد كانوا وفي كمان كانت في يعيلة من معرة النعمان كانت من سكان مدينة دوما هي المجزرة بالتحديد أنا يعني لازم نذكرها، ليش؟ لإنه هي يلي خلت الفصائل المعارضة هي تعمل ردة فعل لتحرير المنطقة. |
|
كنا بالمشفى إنه شلون أنت بدك تنسحب إنه قديش النظام مجرم إنه عم يقصف قسم الحواضن قذائف هاون، هي بداية. |
كريستينا: ثائر كمان بيستذكر مجازر الكيماوي الي شهد عليها بالغوطة سنة 2013، والي منظمات حقوق الانسان والمنظمات القانونية، السورية والدولية، عم تحاول شتى الطرق انها تجلبها للمحاكم ومسار العدالة… |
ثائر: ب2013 هي صار في كثير استهدافات بالأسلحة الكيماوية لمناطق بالغوطة الشرقية هاد الشي لازم كثير مهم نذكره لإنه ما ممكن إنه تنذكر مجزرة 21-آب بدون ما نذكر إنه هو النظام تجرئ وقصف مناطق ثانية بالسارين بالتحديد بغاز السارين لإنه الأطباء حسب الأعراض يلي كانت تبدأ على المصابين كانوا يحكوا شو نوع الغاز. هلأ من لما النظام بدأ بحمص بالتحديد أعتقد بشهر أكتوبر بدأ بحمص استخدام الأسلحة الكيماوية نحن بالغوطة استهدفنا بالكيماوي تقريبا بشهر 3-2013 بدأت الاستهدافات بمناطق شرق الغوطة يلي يصير فيها اشتباكات بالتحديد يعني يلي فيها خط جبهة خلينا نقول كان النظام يقصف خط الجبهة ويستهدف خلينا نقول هون مقاتلين. كانت الإصابات تيجي يعني بين ال10 إصابات ل20 إصابة بتذكر بالعتيبة، بتذكر بالبحارية لحد الشهر الخامس. الشهر الخامس كان هو نقطة فصل صراحة كانت صارت الإصابات تيجي بكثافة أعلى وصار في ناس تموت انقصفت بشهر 5 انقصفت منطقة عذراء، انقصفت منطقة حرستا أكثر من مرة، منطقة البحارية أنا هدول الضربات كلها كنت شاهد عليهن وكنت أنا موثق حتى عندي هلأ لحد الان فيديوهات وصور لناس ضحايا من هي الاستهدافات كانوا معظمهم مقاتلين أنا هي النقطة بدي ركز عليها كثير لإنه ب21-8 الأمر اختلف كل الإصابات من هي الضربات معظمهن يكونوا مقاتلين بخط جبهة مثلا النظام يضرب قنبلة خلينا نقول أو صاروخ على خط الجبهة ما تتعدى إنه تروح لعند هلأ في مدنيين كانوا يشموا الريحة ويجوا عليهن أعراض وإصابات لكن هن المدنيين هدول يلي ساكنين بالمزار بأطراف المدن. |
وبالفعل، التهديد تحوّل لواقع بشهر آب سنة 2013، تحديدا بخمسة الشهر، قصف النظام الجبهة في منطقة عدرا الي بتبعد حوالي 5 - 6 كيلومترات عن مدينة دوما، وتم فيها استخدام اسلحة كيماوية حسب تقارير الأطباء الي اعتمدت على الاعراض الي ظهرت على المتضررين لاحقا… |
ثائر: نتيجة التيارات الهوائية والهواء الي صار انتقلت الغاز أو رائحة الغاز لمدينة دوما انتقل لمدينة دوما بالتحديد بشرق المدينة فصار في حالات اختناق وتأثر بهاد الغاز يلي انضرب بهي الليلة بعذراء لإنه هن المنطقتين يعني كثير قراب على بعض فصار في إسعافات كثير يعني صار في على السكان المدنيين 300 ل 400 إصابة بحالات إختناق لكن ما هي شديدة جدا لدرجة إنه استدعت كثير تدخل طبي بس إنه يحسوا إنه هو صار في تنبيه إلنا إنه النظام ممكن إنه يضرب منطقة مأهولة بالسكان، منطقة مأهولة بالمدنيين بغاز ما في شي بيمنعه فالخوف زاد صراحة يعني نحن لا إلنا دولة كانت نحن عبارة عن يعني مجالس محلية كانت وما عندها أصلا إمكانيات والشي يلي بيجي من دعم من المنظمات الثانية هي الشي يلي عم تعمله خاصة المكاتب الطبية وغيرها فما كان في ما كان في موارد، ما كان في إمكانيات حتى الأطباء هن أعدادهن قليلة، حتى الكادر المدرب هو أعداده قليلة ومتوزع يعني ماله بمنطقة محددة فزاد الخطر، زاد الخوف وزاد الترقب أكثر من الناس. |
كريستينا: وفعلا، بعد ايام من القصف الي صار بخمسة آب سنة 2013، استهدف النظام مناطق سيطرة المعارضة بريف دمشق، تحديدا بالغوطة الشرقية والغربية، وهاجمها بالاسلحة الكيماوية بالساعات الأولى من صباح 21 آب. هالهجمات اسفرت عن مقتل آلاف المدنيين والمدنيات، وبينهم اعداد كبيرة من الأطفال… |
|
كريستينا: في حال بدأت اي محاكمة في المستقبل لهالنوع من الجرائم، الصور ومقاطع الفيديو الي وثقها ثائر، ممكن انه يتم استخدامها كدليل على ارتكاب هالجرائم. رغم الضجة الكبيرة الي احدثها هالجوم الكيماوي عالميا، واعداد الضحايا الهائلة من المدنيين والمدنيات، الهجمات واسعة النطاق والممنهجة ما وقفت… وضلّت بيان تشهد على هجمات ممنهجة وواسعة النطاق على مدينتها تحديدا والمدن المجاورة الها لحد ال 2018 قبل مغادرتها القسرية للبلد… |
فطلعت على تركيا يعني بعد فترة قصيرة من جيتي لتركيا تعرفت على زوجي وتزوجت وطلعت على ألمانيا. |
كريستينا: حسب بيان، جبهة النصرة عممت عليها بتهمة تحريض النساء ونشر أفكار العلمانية والديموقراطية. ثائر كمان نزح من سوريا بنيسان 2018، وحاليا عايش بفرنسا وعم يبحث عن أجوبة ويحاول يلاقي من وين وكيف بده يبلش حياة جديدة بالبلد الجديد… |
|
كريستينا: رغم كل التعقيدات المرافقة لجلب قضايا العمليات العدائية واسعة النطاق والممنهجة للقضاء والمحاكم، الا انه كتير من المنظمات غير الحكومية، السورية والدولية، حاولت تفهم الآلية حتى تساعد بجلب الشكاوى والقضايا للمحاكم، على سبيل المثال، بألمانيا و فرنسا والسويد، تم رفع قضايا جنائية متعلقة بالهجمات بالكيماوي الي صارت سنة 2013… وحاليا، عم يستعد محامين ومحاميات، سوريين ودوليين لرفع قضايا امام المحاكم الاوروبية ولجان الأمم المتحدة، فيما يخص الهجمات على المستشفيات والمنشآت الطبية الي نفذتها القوات الجوية السورية والروسية على مر السنين. بيبقى الوقت والمدة يلي بتطلبها هالتحقيقات المعقدة هو الفاصل لنعرف إذا كانت كل هالجهود رح تأدي لمحاكمات بالوقت القريب… |
|
كريستينا: حاليا، المركز السوري للإعلام وحرية التعبير، مبادرة العدالة في المجتمع المفتوح، و الأرشيف السوري، عم يشاركوا بتقديم القضايا الي ما زالت مفتوحة، والمتهمين وهياكلهم القيادية فيها واضحة، وعم يتم استجواب الضحايا والشهود من قبل السلطات الرسمية، الشي يلي بخلي فرصة بدء هالمحاكمات محتملة في المستقبل. ما فينا نقول أكيد، لكن منتأمل انو يكون فيه مذكرات توقيف، ووقتها، إذا شخص متورط في اي هجوم من هالنوع عمل خطوة خاطئة بالسفر خارج سوريا، من الممكن انه يتم القبض عليهم واحتجازهم. وبعد هيك ممكن تصير فيه محاكمة، طبعا عم نحكي عن سنوات من هلا، ممكن 3، ممكن 6 أو حتى ممكن 10 أو أكتر… |
|
