رغم التحرك البطيء جدا لعجلة االعدالة، الا انو المحاكمات والتحقيقات بجرائم الحرب وجرائم ضد الانسانية المرتكبة في سوريا بتتزايد كل عام، وبتّم بمساقات قضائية مختلفة، ليس فقط في المحكمة الجنائية الدولية المُعطلة سياسيا من قبل روسيا والصين

بهالحلقة الأولى من "مستجدات قصيرة/ محاكمات جرائم الحرب في سوريا"، بتحكيلنا كريستينا كغدو عن الجلسات المتعلقة بقضية تعذيب المعتقلين والمعتقلات في سجون النظام السوري والي بتم بمحكمة العدل الدولية في لاهاي هولندا، وقضية عائلة الدباغ في فرنسا، يلي اخيرا رح يتم اخذها للقضاء في شهر ايار سنة ٢٠٢٤

نصغي معاً في الموسم الثاني والأخير من بودكاست "قيد المحاكمة" لحوارات مع ٢٤ سورياً وسوريةً، يحكون لنا السردية السورية عبر قصصهم الشخصية أو تجاربهم المهنية الاستثنائية خلال سنوات الحرب والثورة والشتات

تأتيكم حلقات هذا الموسم كل جمعة ابتداء من ٢٩ أيلول... ثلاثيات عن جرائم الحرب، التهجير القسري، النزوح، والهوية

 إنتاج وإعداد سليم سلامه، تحرير وتحقق من المعلومات ميس قات، تقديم ومشاركة بالتحرير كريستينا كغدو، مشاركة في التحرير فريتز سترايف

مكساج وماسترنغ: عبد الرزاق الصطوف

أُنتجت حلقات هذا الموسم بدعم من وزارة الخارجية الألمانية عبر معهد العلاقات الخارجية وبرنامج تمويل

ZIVIK

مستجدات قصيرة ١/ محاكمات جرائم الحرب في سوريا

كريستينا كغدو 

 

*مقدمة*

اهلا فيكن بأولى حلقات المستجدات القصيرة يلي عم نقدملكن اياها بعد كل ثلاثية بهالموسم لتكونوا على معرفة بآخر  التطورات بمساعي العدالة  لسوريا…

اسمي كريستينا كغدو، وعم تسمعوا بودكاست قيد المحاكمة: ثلاثيات سوريّة حول جرائم الحرب وطريق العدالة. 

 

 

*بداية*

رغم التحرك البطيء جدا لعجلة االعدالة، ويلي احيانا بيفتح المجال لبعض المجرمين بالهرب او الاختباء من المحاكمة وعدم حضور الجلسات، الا انه المحاكمات والتحقيقات بالشأن السوري صارت عم تزيد كل سنة، وعم بتم بمساقات قضائية مختلفة، يعني مو بس بالمحكمة الجنائية الدولية المعطلة سياسيا من قبل روسيا والصين.

منبدا الحلقة بمدينة لاهاي الهولندية، وتحديدا بمحكمة العدل الدولية، المحكمة الأعلى بالعالم، يلي شهدت يوم تاريخي ب ١٠ اكتوبر ٢٠٢٣  مع بدء جلسات متعلقة بقضية تعذيب المعتقلين والمعتقلات في سجون النظام السوري. الدعوي تم رفعها من قبل هولندا وكندا لعدم التزام سوريا باتفاقية مناهضة التعذيب يلي هي طرف فيها وموقّعة عليها سنة ال ٢٠٠٤. 

هاي المرة الأولى الي بيتم فيها مقاضاة النظام نفسه في المحكمة بسبب ممارسات التعذيب والانتهاكات، بحالات سابقة، كانت عم تتم مقاضاة افراد اشتغلوا سابقا لصالح النظام والي بتكون رتبهم منخفضة إلى متوسطة، مثل أنور رسلان واياد الغريب…

لهيك، فينا نعتبر انها قضية تاريخية رغم الإحباط الناجم عن  إنها أخدت وقت طويل لحتى تنعرض على المحكمة.

***

وصفت الدعوى انتهاكات سوريا للاتفاقية، بإنها انتهاكات ممنهجة و واسعة النطاق، وكان في تركيز على جرائم العنف الجنسي والعنف القائم على النوع الإجتماعي في مراكز الاحتجاز.

***

بتموّز 2022، طلب النظام السوري تأجيل جلسات هي المحاكمة، ومع هيك تغيّب وفده عن حضورها هاد الشهر. 

وبحسب المقال الي نشرته  منصة الجمهورية من كتابة مهند شراباتي وفيرونيكا بيلينتاني، "ركَّزوا هولندا وكندا بمداخلاتهم على الطبيعة المؤسسية للتعذيب في سوريا، والمستويات العالية من التنسيق والسيطرة، وهالشي ببيّن إنّه في نمط متّبع بتقنيّات التعذيب عند جميع الجهات الأمنيّة وبكل أماكن الاحتجاز.  

 

هولندا وكندا ما إكتفوا بالإشارة لأجهزة الأمن والمخابرات – بما في الشرطة والقوات العسكرية – كجهات مسؤولة عن ارتكاب أعمال التعذيب؛ لكنهم شملوا كمان عناصر من النظام القضائي والرعاية الصحية. وبعدد من الحالات، قالوا إنو ضحايا التعذيب ماتوا أثناء علاجهم في المستشفى، مأكدين على استخدام المستشفيات في سوريا كمَرافق للتعذيب."

بموسمنا الاول من قيد المحاكمة، تحديدا بالحلقة التانية والتالتة، حكينا عن استخدام النظام السوري للأجهزة الطبية والمستشفيات كأماكن للتعذيب، وعن كيف تم استهداف الأجهزة الطبية ببعض المناطق قصدا لقطع المساعدات والعلاج عن المدنيين والمدنيات… بدعوكن ترجعوا تسمعوهن حتى يتوضح عندكن السياق من افواه الضحايا يلي عاشوا هالتجارب واختبروها. 


 

ضمن الجلسة، هولندا وكندا اكدوا على انه الحكومة السورية ما زالت متورطة بشكل فعال في الممارسة الوحشية للتعذيب وسوء المعاملة، واشاروا أنه تم توثيق 15 شخص على الاقل من يلي لاقوا حتفهم تحت التعذيب من وقت ما تم رفع القضية أمام المحكمة في حزيران ال ٢٠٢٢.

بهالسياق، شددوا هولندا وكندا على أنه مش ممكن الاعتماد على سوريا للامتناع "بمحض إرادتها ودون أمر مُلزم من المحكمة" عن ممارسة أعمال التعذيب وأشكال سوء المعاملة ضد سكانها؛ ولهالسبب، طلبوا من المحكمة الإعلان عن تدابير مؤقته لمنع المزيد من الوفيات و المعاناة.


 

خارج المحكمة، ولساعات وايام سبقت الجلسة، اجتمع عدد كبير  من عضوات وأعضاء مجموعات الضحايا والناجيات والناجين والناشطات والناشطين بوقفات داعمة للقضية، وبحسب "شبكة النساء الآن" التجمعات ما كانت فقط بلاهاي، وانما كمان في عدة مدن في الشمال السوري والسويداء، ويلي فيها رفع صور لضحايا التعذيب والاخفاء القسري، ولافتات تانية بتأكد على أهمية هالمحاكمة.

على فكرة، في إمكانية لمتابعة هالجلسات عبر الإنترنت من خلال البث المباشر على الموقع الإلكتروني لتلفزيون الأمم المتحدة. 

***

غياب ممثلي النظام عن المحكمة ما بيعني عدم مشاركته في القضية عالإطلاق، أو أنه القضية رح توقف نتيجة هالشي. بالعكس تماما؛ رئيس المحكمة اشار أنه المحكمة “بتأسف لغياب الجمهورية العربية السورية”، وأضاف بنهاية الجلسة أنه المحكمة رح تصدر قرارها بشأن التدابير المؤقتة في أقرب وقت ممكن. وبعد هيك، رح يكون في فرصة لكل الأطراف انهم يناقشوا القضية بجولات مكتوبة من المرافعات، والي رح تستمر لسنوات قبل ما المحكمة تاخد قرار نهائي ومُلزِم.

على سيرة العائلات، وثقنا بالموسم الأول من قيد المحكامة، قصص ومحاكمات جارية بحق متهمين بإرتكاب جرائم قتل وإخفاء قسري، مندعوكم تسمعوها للتعرفوا بشكل معمق علي كل الجهود القائمة بمختلف المحاكم والدول، والي عم يدفعها ويحركها شهود وشاهدات ومنظمات حقوقية وقانونية. 

 

ومن القضايا يلي حكينا عنها وقتها، قضية عائلة الدباغ… وهون عندنا مستجد آخر،  وهو انه اخيرا رح يتم اخذ القضية للمحكمة ب باريس/ فرنسا، بالنصف الاول من السنة القادمة، سنة ٢٠٢٤، تحديدا بين 21 و 24 أيار . 

 
هالقضية ضخمة ومهمة علي الرغم من انها كمان رح تكون بغياب المتهمين علي مملوك وجميل حسن وعبد السلام محمود… ويلي بيخليها مهمة، هو انها رح تكون القضية الأولى ضد مشتبهين من مناصب كبيرة ومباشرة ومرتبطة ببشار الأسد والسنوات الأولى من الثورة.

متوقع انه المحاكمة تكون قصيرة لانه المشتبه فيهم مش حاضرين، وبالتالي ما رح يكون عندهم أي فرصة للدفاع عن أنفسهم، وما رح يكون في مرافعة من جانب الدفاع. لكن إذا تم القبض عليهم لاحقا، فرح يتم اتاحة الفرصة لإعادة محاكمتهم.

***

خلال المحاكمة، رح تسمع المحكمة للأدلة الي جمعها المدعي العام الفرنسي على مدار سنوات عديدة، بما فيها مواد من المنشق المعروف والملقب ب "قيصر" وكتير من إفادات الشهود من الضحايا وعائلاتهم… كل هاد بيوصل للعالم معانات الشهود والضحايا واهاليهم وبفرجيه نضالهم المستمر من أجل العدالة.

 

*خاتمة*
 

**********************************

 

هاي كانت ابرز المستجدات بهالحلقة القصيرة، مندعوكم لمتابعة اعمق اذا كنتوا مهتمين بآخر التطورات عبر الروابط الي تركنالكن اياها بالوصف المكتوب للحلقة. 


منتلاقى الاسبوع الجاي لنكفي بحواراتنا ونبدأ بالثلاثية التانية، ويلي منركز فيها الحديث على آثار  الجرائم المحتملة المرتكبة بسوريا من مختلف الأطراف على كل ما هو غير بشري:  متل الموروث الثقافي، العادات والتقاليد، اللغة، البيئة، الذكريات، البيوت والأراضي، والممتلكات.

كونوا بخير، مع السلامة. 

**********************************