بالحلقة الثالثة والاخيرة من "مستجدات قصيرة/ محاكمات جرائم الحرب في سوريا" بنشارك معكم معلومات مفصلة عن الخبر والمستجد الاكبر بهالموسم؛ خبر إصدار القضاء الجنائي الفرنسي مذكرة توقيف بحق بشار الأسد... اسمعوا هالخبر وغيروا داخل هالحلقة

نصغي معاً في الموسم الثاني والأخير من بودكاست "قيد المحاكمة" لحوارات مع ٢٤ سورياً وسوريةً، يحكون لنا السردية السورية عبر قصصهم الشخصية أو تجاربهم المهنية الاستثنائية خلال سنوات الحرب والثورة والشتات

تأتيكم حلقات هذا الموسم كل جمعة ابتداء من ٢٩ أيلول... ثلاثيات عن جرائم الحرب، التهجير القسري، النزوح، والهوية

 إنتاج وإعداد سليم سلامه، تحرير وتحقق من المعلومات ميس قات، تقديم ومشاركة بالتحرير كريستينا كغدو، مشاركة في التحرير فريتز سترايف

مكساج وماسترنغ: عبد الرزاق الصطوف

أُنتجت حلقات هذا الموسم بدعم من وزارة الخارجية الألمانية عبر معهد العلاقات الخارجية وبرنامج تمويل

ZIVIK

روابط ومصادر

موقع البدوكاست

القضاء الفرنسي يصدر مذكرة توقيف بحق بشار الأسد بتهمة التواطؤ في جرائم ضد الإنسانية

مستجدات قصيرة ٣ / محاكمات جرائم الحرب في سوريا

كريستينا كغدو 

*مقدمة*

اهلا فيكن بحلقة  المستجدات القصيرة التالتة، يلي عم نقدملكن اياها بعد كل ثلاثية بهالموسم لنطلعكن على آخر  التطورات بمساعي العدالة  لسوريا من محاكمات وتحقيقات.

اسمي كريستينا كغدو، وعم تسمعوا بودكاست قيد المحاكمة: ثلاثيات سوريّة حول جرائم الحرب وطريق العدالة. 

 

*بداية*

وصلنا معكم لنهاية رحلة استمرّت ١٨ شهر من التفكير في بناء وهوية البودكاست، إختيار فريق العمل المتوزع  بكل الكرة الارضية، مقابلات الضيوف والضيفات، تسجيل اصواتهن، كتابة النصوص وتحريرها والتحقق من المعلومات الواردة فيها، وانتاج الحلقات بشكلها النهائي لتكونوا قادرين وقادرات تسمعوها وتشاركوها، وتكون قادرة انها توثق هالفترة الزمنية يلي عم ننشهدها ، ونأثر ونتأثر فيها… 

بالموسم الاول من قيد المحاكمة، حكينا قصص وسرديات الشهود والشاهدات والضحايا، وربطانها بمحاكمات بتدور حواليها… وبالموسم التاني والاخير، قدمنالكم ثلاثيات حوارية مع ٢٤ سوري وسوريّة من جوات سوريا وبراتها، ونهينا معكن بعد كل ثلاثية بحلقة مستجدات قصيرة لتواكبوا المحاكمات يلي عم تتم او عم تتحضر.

للصدفة البحته، ويلي ما كنا متوقعينها ابدا لما بلشنا شغل على البودكاست، الخبر والمستجد الاكبر بيوصلنا مع انتهاء الموسم… خبر إصدار القضاء الجنائي الفرنسي مذكرة توقيف بحق بشار الأسد. 

***

مذكرات التوقيف يلي صدرت بتاريخ ١٤ تشرين التاني ٢٠٢٣ ما اقتصرت على بشار، تم إصدارها كمان  بحق اخوه ماهر الأسد، قائد الفرقة الرابعة بالجيش السوري، والعميد غسان عباس، مدير فرع 450 في مركز البحوث العلمية، والعميد بسام الحسن، صِلة الوصل بين القصر الرئاسي ومركز البحوث، والمستشار الرئاسي للشؤون الإستراتيجية. 

حسب منصة الجمهورية، بتتهم المذكر ة بشار الأسد وأعوانه بالمشاركة بجرائم حرب وجرائم ضد الإنسانية وتأييدها. 

القضاء الفرنسي كان فاتح تحقيق جنائي بالاستناد لشهادات ناجين وناجيات من هجوم الغوطة الكيماوي ب آب 2013، وهالشي كان بناءً على شكوى مدنية تقدم فيها المركز السوري للإعلام وحرية التعبير وضحايا سوريين وسوريات ب آذار 2021، بدعم من مؤسسات الأرشيف السوري، ومبادرة عدالة المجتمع المفتوح.

الشكوى تقدمت أمام الوحدة المتخصصة بالجرائم ضد الإنسانية وجرائم الحرب بالمحكمة القضائية بباريس… فرنسا هي وحده من الدول الي بتمنح محاكمها صلاحية استخدام مبدأ الولاية القضائية العالمية للتحقيق بالجرائم الدولية الفظيعة المرتكبة خارج حدودها الاقليمية، وبتخول مقاضاة مرتكبيها في ظروف معينة. حكينا بالتفصيل عن هاد الموضوع بحلقتنا الأولى من الموسم الاول من البودكاست اذا بتتذكروا، واذا لأ، او ما سمعتوا الموسم الاول، بنصحكن تتوجهوا اما لمنصة الاستماع يلي عم تسمعوا منها هالحلقة، او لموقع البودكاست يلي تركنالكن اياه بالوصف المكتوب… 

حسب مقطع من مقال منشور بتاريخ ١٥ تشرين التاني على صفحة فرانس ٢٤، بقول مدير المركز السوري للإعلام وحرية التعبير مازن درويش بِبيان موقع من المنظمات المدعّية، إنو مذكرات التوقيف هاي بتشكل "سابقة قضائية تاريخية ونصر جديد للضحايا وعائلاتهن وللناجين والناجيات، وخطوة جديدة عطريق العدالة والسلام المستدام بسوريا".

قال مازن انه الشكوى استندت ل "شهادات مباشرة من العديد من الضحايا والناجين والناجيات" من الهجمات الكيميائية. واحتوت على "تحليل شامل لتسلسل القيادة العسكرية السورية وبرنامج الأسلحة الكيميائية" بالاضافة ل "مئات الأدلة الموثقة بما فيها الصور ومقاطع الفيديو".

***

الملفت بالموضوع انه بشار الاسد كان من المفترض يشارك بقمة المناخ يلي انعقدت ب دبي بشهر ١٢ - ٢٠٢٣، الشي يلي صار عليه ضجة اعلامية كبيرة، واستياء من دعوته للمشاركة، والي بيتزامن مع الاستياء والاستنكار الكبير لارجاع سوريا متمثلة بنظامها الحالي لجامعة الدول العربية في بدايات ال 2023.

لكن بالنهاية بشار ما سافر ولا شارك بقمة المناخ، واقتصرت المشاركة على وفد سوري…
حسب خبراء، امتناع بشار الاسد عن المشاركة في القمة هو عالاغلب قرار مدروس وفي علاقة بينه وبين مذكرات الاعتقال يلي حكيت عنها. هالشي بيعني أنه مذكرات التوقيف بالفعل الها تأثير سياسي ملموس، ورح تحد من حرية حركة بشار الأسد بشكل كبير لأنه رح يضل خايف من  أنه يتم القبض عليه.

 

الشهور ، والسنوات الجاية رح تكشفلنا كتير، وما منعرف إذا رح يتم اعتقال بشار الاسد ومحاكمته أو لا، بس كوننا وصلنا لهالمرحلة، يمكن محرز نقول انه الدائرة عم تضيّق على بشار الاسد واعوانه، ويبدو انه فرص هروبهن المستمر عم تتقلص؛ وهالشي ممكن يودي بيوم قريب لإيقاف ومحاكمة! 

مين بيعرف؟ الايام، والجهود يلي ما عم تنقطع من الضحايا والشهود والمؤسسات رح تقلّنا.
 
***

منختم معكن من هولندا، وبخبر ذكرنا اجزاء منّه بحلقة المستجدات السابقة… 

ب 16 تشرين التاني 2023، اصدرت محكمة العدل الدولية أمر  باتخاذ تدابير مؤقتة في القضية الي رفعتها حكومة هولندا وحكومة كندا ضد سوريا بسبب انتهاكات اتفاقية مناهضة التعذيب…

 

انعقدت جلسات الاستماع بنهايات تشرين الأول، وبعد مرور اكثر من شهر ، وخلال النظر بالقضية، تم اصدار أمر لسوريا بانها تاخد جميع التدابير الفورية لوقف التعذيب مع ضمان عدم قيام المسؤولين بارتكابه. وتم أمر سوريا بمنع تدمير الأدلة المتعلقة بالتعذيب وضمان الحفاظ عليها… 

المقصود من هالأوامر كلها هو أنه سوريا تلتزم فيها أثناء استمرار التحقيق بهالقضية المفصلية. وهالشي ممكن ياخد سنوات حتى يتم اصدار القرار النهائي من محكمة العدل الدولية. بس لوقتها رح تبقى هالاوامر قائمة ويفترض انها تضل قيد التنفيذ. 

وأخيرًا، وقبل كم يوم بس، وتحديدا ب 8 كانون الأول 2023، اعتقلت الشرطة الهولندية عضو مزعوم في ميليشيا موالية للنظام بتقول إنه كان رئيس للمحققين بقوة الدفاع الوطني بالسَلَميّة. 

هالاعتقال مبني على عدة تهم بما فيها: التواطؤ في التعذيب، والعنف الجنسي) باعتبارها جرائم ضد الإنسانية. 

هي تاني قضية بهولندا من يلي بيتناولوا جرائم النظام، وهالمرة يبدو أنه المتهم رتبته  أعلى من واحد من عناصر لواء القدس يلي حكينا عن القضيّة المرفوعة ضدّه بحلقة المستجدّات السابقة. 

غير هيك، هالتهم بتشمل العنف الجنسي باعتبارها جريمة ضد الإنسانية، وهالشي رح يزيد من الأدلّة يلي بتثبت ارتكاب النظام لجرائم جنسيّة والي تم الكشف عن جزء منها بمحاكمات تانية مثل محاكمة الخطيب بكوبلنز، ومحاكمة علاء م. في فرانكفورت.

صحيح عجلات العدالة اغلب الوقت يطيئة بس أحيانا بيفلتوا الفرامات على نزله، وهي وحده من اللحظات يلي عم تشهدها عمليّة السعي للعدالة للسوريات والسوريين، وسوريا.

*خاتمة*
 

**********************************

 

هاي كانت ابرز وآخر المستجدات بهالحلقة القصيرة… منشكركن على متابعتنا والاستماع لحلقات هالبودكاست بالموسم الأول، والتاني. 

بودكاست قيد المحاكمة من كتابة واعداد وانتاج سليم سلامه، تقديم ومشاركة في التحرير كريستينا كغدو، تحرير وتحقق من المعلومات ومشاركة في الاعداد ميس قات، مشاركة في التحرير  وتحقق من المعلومات القانونية فرتز سترايف، وباقي فريق العمل يلي بتلاقوا بعض اساميهم بالوصف المكتوب.

أُنتج هالموسم بدعم من وزارة الخارجية الألمانية عبر معهد العلاقات الخارجية وبرنامج تمويل ZIVIK.

**********************************