قبل ما نبدأ، مهم انّوه انو هالحلقة بتحتوي على اوصاف عن الاعتقال السياسي وسجون النظام السوري. منرجوا انكن تاخدوا الحيطة والحذر، او تتوقفوا عن الاستماع لو احتجتوا.  

فرج:  أنا من بلاد الله الضيقة أعني من سجون ومعتقلات يديرها آل الأسد برضا إقليمي ودولي… إذا كان الاعتقال والمنفى عملا فمعنى ذلك أني عملت 14عام كمعتقل و17 عام كمنفي. 

كريستينا: بحلقاتنا الماضية، ولما سألنا ضيوفنا وضيفاتنا عن العدالة؛ معناها، قيمتها، وآليتها… اختلفت الأجوبة وتنوعت، لكنّ كان في إجماع، على انه الضباط الرئيسيين؛ بشار الاسد واعوانه المباشرين والمنفذين لعمليات القتل والتعذيب والمجازر، همّه الأشخاص الي لازم يتم جلبهم بالدرجة الأولى للعدالة والمُساءلة والوقوف امام القضاء. 


رأي 1: كبار المجرمين بالنظام السوري على رأسهم بشار الأسد، يعني على رأسهن النظام، لإنه هاد مطلبنا الأول كان والي كان بينهي كثير مشاكل، يمكن لو راح، يعني الناس بتجي بتقلك، “اوك لو راح كنتوا وكنتوا”، نحن مستعدين كنا نتحمل النتائج، كشعب قام بالسورة وكذا، كان مستعد يتحمل النتائج، بس هو يروح.

رأي 2: بالنسبة إلي كسوري يعني المجرم الأول والأخير هو بشار الأسد ورؤساء فروع المخابرات بسوريا السابقين والحاليين وكل الضباط، ضباط الجيش الي معروف إنه هن شاركوا بالاقتحامات وحصار المدن، كمان هدول بالدرجة الأولى من المجرمين الازم يتحاسبوا.

رأي 3: ضباط المخابرات كل الفروع الأمنية، العائلة المالكة هي كمان أو العائلة الحاكمة هي أيضا من يعني من مجرمي الحرب، الأعمام، الأخوال هم رأس النظام يعني 

رأي 4: من وجهة نظري كسورية رأس النظام السوري بشار الأسد هو أكبر مجرم بسوريا. طبعا ما فينا ننسى أسماء الأسد وضباط المخابرات كل هدول ما فينا نستثنيهم من الإجرام.


رأي 5: كل رمزو النظام هن المجرمين الأساسيين بشكل أساسي بالإضافة للي فعلا هدول الضباط الكبار الي نفذ بالنقطة الأساسية. بالنسبة لجريمة الكيماوي أهم شخص لا يمكن يؤخذ قرار بالقصف الكيماوي إلا عبر شخصيتين أساسيتين علي مملوك ورأس النظام بشار الأسد.


كريستينا: لحد هلا، تركيزنا بهالبودكاست كان على الجرائم والفظائع الي ارتكبها وعم يرتكبها النظام السوري من سنة ال 2011 لليوم، لكن حتى نقدر نكمل بالحديث عن هالفترة وما تلاها، لازم نرجع بالضرورة خطوة لورا، او بالأحرى، عقود لورا؛ لعهد حافظ الأسد، حَرَسه، حُكمه، ونظامه. ونسمع سوا، من لسان احد المعتقلين السياسيين السابقين، عن آلية حُكم نظام الاب والابن ومنهجهم المتسلّط، والدموي.

 

اهلا فيكن بالحلقة الرابعة من "قيد المحاكمة: عن متهمي وضحايا الجرائم في سوريا". مدونة صوتية باللغة العربية منِصغي فيها لقصص وتجارب حول المشهد المتناثر لجهود العدالة والمحاسبة على الجرائم الجسيمة المرتكبة في سوريا، في محاولة لفهم ألغاز التحقيقات، وأسرار المحاكمات القضائية؛ الماضية، الجارية، والقادمة. 

اسمي كريستينا كغدو، ورح كون عم رافقكن خلال حلقات هالموسم يلي رح نصغي فيه لشهود وشاهدات، اصحاب قصص، صوت الشارع، ومختصات وأخصائيين بالشأن القضائي والحقوقي، لنحاول نفكّك ونفهم مع بعض، لوين ممكن تاخدنا هي المحاكمات، وشو هو معنى العدالة بظل استمرارية رئاسة النظام السوري المسؤول عن انتزاعها.

فرج: أنا اسمي فرج بيرقدار بكامل قضاؤه وقدره ولعنة ظروفه الحجرية

أنا من قرية تير معلا تقع شمالي حمص ببضعة كيلو مترات ولكني أمضيت شبابي لاجئ في مخيمات فلسطينية سورية: في حمص مخيم العاهدين، في دمشق مخيم اليرموك، وفي بيروت أيضا.

أما واقع العمل فقد كان في صحف معارضة أي ممنوعة وكذلك كتبي أيضا ممنوعة باستثناء كتاب واحد.

 

فرج: المسؤول عن اعتقالنا هو النظام بتركيبته الأسدية المعروفة أو الي صارت معروفة بوقتنا كان ما معروف والبعض يقول ليش عم تعارضوه. الان ما عاد حدا بقول هيك الان صار مكشوف الأسد وبالتالي بالسجن حتى أثناء التحقيق بجولات تعذيب كان بقدر السجين يميز بين هذا المحقق وذاك، بين هذا الجلاد وذاك بمعنى الأوامر بتيجي من فوق من أحد ممثلين النظام إنه لنقل اجلدوه لفلان مئة جلدة. هلأ في سجان بجلدك حوالي 90 بتدرك إنه ما بقوة بكل حزمه، ويعني بمماطلة بمناورة أكثر من هيك… وفي سجان كان يضرب الحيط والأرض ويقول لي بس مشان الله صرخ، قول له أنا ما فيني صرخ كذب هذا عملك الوظيفي اضربني ولا تقلق أنا ما رح أنزعج منك أبدا. فهو ما يتحمل يعني كيف بدي أضربك يا أخي والله العظيم ما بس كمان ما تورطني إذا ما سمعوا صراخك ما رح يحلوا عني 

طيب ضابط بتحسه طنش على جانب ما بتحقيقك وهذا حصل معي, وضابط بحاول يكنش أي تفصيل حتى لو اقتضى إنه يزيد تعذيبك جولتين أو 3 أو يجيب اخرين يعذبوا معك. متباينين الأشخاص إن كان بالقيادة فوق وإن كان بالضباط ما يسمى الأعوان أو المتوسطين وانتهاء بالعساكر وصف الضباط. بتدرك هي الأمور بس رغم إدراكك إلها بتقول إنه أخي هذا الله وكيلكن بريء نواياه أبدا ما غرضها لا تقتلني ولا تعذبني ولا شيء ولكن انوجد بوضع صار هو كرهان حاله، يا سيدي والبعض صاروا مرضى نفسيين والبعض مرضى نفسيين بالطريقة المعاكسة صار مع النظام وصار مدمن تعذيب ولا يستطيعوا إذا ما أخذ حصته اليومية من التعذيب بحس إنه راح يختنق فبطلع أي واحد بفش قهره فيه. 

البشر متباينة وبالقادة أيضا في حالات متباينة ولكن النظام ما في تباينات؛ النظام كله ككيان هو المسؤول عن كل ما جرى هو مهد له حتى عناصره أو ضباطه الي تشوهوا صاروا حيوانات يعني عندهن حس بهيمي واضح حتى هدول أنا بقول النظام بتحمل جزء المسوؤلية بإنه هاد ما بس عم يدمر السجين عم يدمر أزلامه عم يدمر آلته أو أدواته الي عم يستخدمهن.

كريستينا: بما انا عم نحكي عن المسؤلين المباشرين عن الجرائم، على الأقل من وجهة نظر فرج بيرقدار، والاصوات السورية يلي سمعناها ببداية الحلقة وخلال حلقاتنا السابقة، خلينا نفهم، ليش كبار المجرمين والمسؤولين المباشرين عن تنفيذ الاوامر والانتهاكات، الي بروح ضحيتها كتار من المدنيين والمدنيات، سواء بالحبس المؤبد، التعذيب، او القتل، ليش من الصعب انه يتم جلبهم للقضاء ومحاسبتهم على هالجرائم الجسيمة؟ 


المشكلة الأولى والرئيسية بهيك حالة، هي انه هالأشخاص ما زالوا عم يشغلوا مناصبهم، يعني بعدهم بالسلطة، وبمنصب رسمي بالدولة، وهاد بيعني انهم بيتمتعوا بالحصانه. 

الحصانه، على المستوى الدولي، هي عبارة عن اداة بتحمي سيادة الدولة واستقلالها، وبتوقف بين هالاشخاص الي بمناصب هالدولة، ومثولهم امام القضاء او المحاكم الأجنبية، يعني اي محكمة خارج هاد البلد.

الي بيتمتعوا بهاي الحصانه بشكل اساسي هنه الدبلوماسيين، موظفي الامم المتحدة، اعضاء البرلمان، اعضاء الحكومات، ورؤساء الدول او الحكومات؛ حتى لو كان تمسكهم بهالمناصب عم بتم بطريقة غير شرعية، طالما انهم عم يشغلوا مناصبهم، فالحصانه بتضلها فعّالة. 

هالمبدأ مكرّس بشكل قوي بالقانون الدولي، لانه سيادة الدولة هي احد اهم قيم هالقانون.

هاد الشي بينطبق على المحاكم الوطنية، متل كوبلنز مثلا… اما المحاكم الدولية او المحكمة الجنائية الدولية ممكن انها تلاحق هاي القضاية بالرغم من الحصانه، لكن بما انه الطريق معطّل بالسيّاق السوري، للاسباب يلي ذكرناها قبل، فهاي تعتبر ورقة رابحة لبشار لأسد.

وحتى لو هالقوانين تغيرت بالمستقبل، وصار في تحقيق وتوجيه تهم ومذكرات توقيف، بخلاف الحصانه، فوقتها رح يكون في مشكلة تانيه، وهي عدم وجود قوة عند هاي الجهات، سواء متمثله بشرطة او بجيش، تمكهنا من الدخول على سوريا وتوقيف هالمسؤولين وجلبهم لهالدول ومحاكمها. 

وهيك، منرجع على مسألة الإرادة السياسية يلي شرحنا عنها بالحلقات السابقة، ورح نطرقلها لاحقا بحلقة اليوم مع فرج بيرقدار… 


بالفترة الي كان فيها فرج معتقل، وعم يتنقل ما بين فروع الأمن وسجن تدمر الصحراوي وسجن صيدنايا العسكري، كانت في حملات دولية واسعة للمطالبة بالإفراج عنه.

هالحملات شارك فيها مئات الكتاب والفنانين العالميين، وعدد كبير من الشخصيات الحقوقية والسياسية، بالإضافة لمنظمات متل: اللجنة العالمية لمناهضة القمع، منظمة صحفيين بلا حدود، نادي القلم العالمي، منظمة العفو الدولية، وغيرها.  

وبالرغم من هيك السلطات السورية ما رضخت لضغوط الحملة إلا بعد 14 سنة تقريبا من الإعتقال. بالتحديد سنة ال 2000، سنه موت حافظ الأسد وتورّث بشار للسطله من بعده.

 

سألنا فرج عن مين برأيه لازم يتم جلبهم للمحاكمة والوقوف امام القضاء، في حال تغير شي من يلي ذكرناه سابقا، وبدأت محاكمات لكبار المجرمين بيوم من الأيام… 

 

فرج: هلا حرس قديم وحرس جديد، هاد مصطلح يعني درج مع مجيء بشار الأسد لوراثة الحكم، وما بعرف مدى دقته، او خليني قول انا بحسه مانو دقيق ابدا… يعني شو بحدد انه هالشخصية هاي من الحرس القديم او الجديد، هل كل شي سرّحوا بشار الاسد هنّه الحرس القديم؟ يعني أنا خليني قول بعرف من الحرس القديم يعني من أيام الأب من 1978 باعتقالي الأول بالجوية كان المحقق الرئيسي معي هو علي مملوك كان برتبة مُقدم، ومساعده ملازم أول كان اسمه جميل حسن… هلأ هدول من هديك الأيام وبعد الثورة 2011، وما عندي مشكلة تتسمى ثورة، تتسمى انتفاضة، يعني التسميات ليست مهمه، بالمحصلة في ملايين نزلت عالشوارع ضد هاد النظام، ولكن هدول التنين تموا مستمرين لهلأ، يعني علي مملوك مرة بنشوفه بتركيا ومرة بنشوفه بإيران يعني شغال، جميل حسن تسرح وتقاعد بس يعني هو بعد 2011 هو صاحب فكرة البراميل العمياء المتفجرة هاد شو بدنا نسميه حرس قديم ولا جديد؟ أنا باعتقادي الأسد ما بهمه هيك تصنيفات قديم ولا جديد بهمه معي ولا مانك معي 

هلأ معي إذا ختيرت بتتقاعد بس لما بلزم برجعك بعد 2011 رجع كتير ألوية كانوا متقاعدين رجعهن للشغل فمانا قضية عند النظام هي قضية عند اخرين وعند باحثين عجبهن هاد التصنيف حرس قديم وحرس جديد أنا برأيي أنصار النظام بجملتهن هن يعني على المسطرة وفق أسوأ تصنيف ممكن تقولوا عن رجال النظام إن كان شابا وإن كان عجوزا القصة قصة دور وسخ يقوم فيه الاثنين

فهاد هو واقع الحال، فأنا لا تعنيني قصة حرس قديم وحرس جديد.

فرج: قيادات الأجهزة الأمنية كلها خايفة من بعضها يعني وكل واحد بيزايد على الاخر بمدى محبته وإخلاصه للنظام لإنه بيخشى من أي كلمة تتفسر غلط ويروح يعني يوصل للرئيس وبعدين يعني ينكب برا أو ينزت بالسجن مثلا.
 

صار أجهزة الأمن امتيازاتها هائلة وبالتالي ما حدا بضحي فيها أخي، حتى لو بلحظة ما الرئيس قال له stop أنت ممنوع تعمل 1، 2، 3 الي بعملها هي الشعبة الفلانية على العين والراس خلص متل ما بدك معلم يعني… 

فبإعتقادي النظام الأسد يعني كان نص اهتماماته هي لدراسة كيف يحتفظ بعرشه والنص الباقي كان للمستقبل وللأسرة وللثروات وإلى آخره… 

فرج: أنا باعتقادي الأمر بانتظار تقاطع مصالح دولية وإقليمية هالتقاطع لازم يكون بصورة بتسمح بإنه يستفيد منها شعبنا. من هون لهداك الوقت للأسف ما فينا نراهن على شيء كبير ولكن من واجبنا الاستمرار بإنه يعني نفعل ما هو ممكن بالمعنى الذاتي حتى لو الظروف ضدنا بس المعنى الذاتي نحن أخي فينا نلعب دور ولو جزئي أو تراكمي مهما كان بسيط ودائما يعني كما يقول المثل في الإمكان أبدع مما كان. من هون لهداك الوقت أي تنظيم أفضل للجهود، أي تسهيل أفضل للجهود وأي يقظة، أي مراكنة بشكل نفتحها لاحقا 

متل الي وثقوا مثلا في ناس موثقين الانتهاكات، عدد الضحايا بصيبهن، عدد الضحايا هائل وفي ناس وثقته وفي ناس وثقت بالصوت والصورة وعبر أفلام وثائقية وعبر كتابة وعبر كتابة وعبر صور كاميرا هاد كله أنا باعتقادي هو مقدمات بس ما فينا نستثمرها إذا ما أجى هاد الظرف الي فيه تقاطع مصالح دولية للأسف نحن المصالح الدولية والإقليمية دائما تتقاطع بس بما لا يخدم مصلحة الشعب السوري يعني ما صارلنا ظرف مثلا متل الشعب الفيتنامي، أمريكا بكامل يعني جيشها ومهابتها ومخابراتها وأسلحتها ما قدرت تحتلها لفيتنام، واضطرت تنسحب. نحنا ما التقى جانب اقليمي او دولي يقول مصلحتي، مصلحة شعبي اني ادعم السوريين، ما التقى… باللحظة الي بتتقاطع بعض مصالح بين دولتين أو 3 أو أكثر أو أقل يحسوا إنه أخي مهم دعم الشعب السوري وقتها سيكون هناك إمكانية تسمير هي الجهود الذاتية 

حتى الان ما في وضع إقليمي أو دولي من مصلحته يسقط النظام وبالتالي ما فيك تجرهم للعدالة. 

كريستينا: الاعتقال السياسي، والاعتقال من غير تهمه، وكل انواع الاعتقال الغير قانوني، هي مو شي جديد على نظام حكم الأسدين، والي صار وعم يصير من ال 2011 لليوم، هو كمان استمرارية للي كان يصير على أيّام حافظ الاسد. 

ويمكن احد ابرز ضحايا هالاعتقالات، هو المعتقل السياسي السابق عماد شيحة، ويلي رجع ينذكر اسمه وتاريخه بالاسابيع الأخيرة بعد رحليه عن عالمنا بنهاية شهر ايلول سنة 2022. 

لما كان فرج بيرقدار عم يحكيلنا عن سنوات اعتقاله، حكى قديش كان خجول من رقم ال 14 سنه، مقارنة بمعتقلين سياسيين تانيين… وقتها حكى عن اعتقال عماد شيحة يلي دام قرابة ال 30 سنة… 

فرج أكّد انه اعتقال أي مواطن حر من أجل رأيه ولو لساعة واحدة، المفروض يعتبر جريمة، فما بالنا بكل هالسنوات؟

 
أعتقل عماد شيحة بمطلع عشرينياته سنة ال 75، وطلع منها سنة ال 2004 بخمسينياته، برفقة اكتر من 120 معتقل سياسي.. وبعد خروجه مباشرة، بدأ بالعمل السياسي والثقافي… 

اعتقال عماد كان بسبب مواقفه السياسية وانتمائه للمنظّمة الشيوعية العربية، الي كان توجُّهها اليساري الثوري ومواقفها، سبب في قيام نظام الأسد الأب بإعدام عدد من مؤسّسيها وبالحُكم على عدد آخر من أعضائها بالسجن المؤبّد والأعمال الشاقّة. 

دُفن عماد شيحة في مقبرة باريس بفرنسا بالتامن من تشرين الاول، بحضور زوجته، ابناءه، وعدد كبير من السوريات والسوريين الي حضروا من مختلف الدول المجاورة ليودعوه للمرة الأخيرة.

 

بحلقة اليوم، صبّينا تركيزنا على احتماليات وتعقيدات مُحاكَمات كبار المجرمين الأفراد، وبحلقتنا القادمة، رح ننتقل لنفهم آليات محاكمات كبار مرتكبي الجرائم او المشاركين فيها من الشركات… هل بتنتطبق عليهم نفس الظروف؟ هل في محاكمات فعلا مبلّشة؟ ومين هنّه هدول الشركات…  

 

هالحلقة من كتابة واعداد وإنتاج سليم سلامه، تحرير وتحقق من المعلومات ميس قات، تقديم ومشاركة بالتحرير كريستينا كغدو، مشاركة بالتحرير فريتز سترايف، وباقي فريق العمل يلي تلاقوا بعض اساميهم بالوصف المكتوب.

أُنتجت هالحلقة بدعم من وزارة الخارجية الألمانية عبر معهد العلاقات الخارجية وبرنامج تمويل ZIVIK.